O BNG brionés renova a súa confianza en Xesús Pena Espiña como candidato á alcaldía de Brión.

Brión,02 de febreiro de 2011. A asemblea local do BNG de Brión volveu a depositar a súa confianza no seu portavoz municipal, Xesús Pena Espiña como candidato á alcaldía nas vindeiras eleccións municipais do mes de maio.
Segundo se manifestou na propia asemblea, o concello de Brión precisa un cambio, outra maneira de facer política que e so pode vir da man do BNG. Non vai vir nin do PP coas súas políticas de confrontación nin tampouco pode vir do actual alcalde que leva mais de trinta anos no poder e que nos últimos anos ven de apostar polo partido do PSOE que ten o encargo de desmontar o estado do benestar É o BNG o único que vai traballar un afortalamento na prestación de servizos públicos, na defensa do etado do benestar e que pode garantir a transparencia e “achegar” a Casa do Concello aos veciños e veciños de Brión.
En palabras do propio candidato, Xesús Pena “as veciñas e veciños Brión necesitan que o BNG teña un papel relevante no concello, que sexa parte activa das iniciativas que dende o grupo de goberno se leven a cabo”. Iniciativas que garantan a educación pública en todos os niveis no noso concello, dende infantil ate os ciclos de formación. Iniciativas encamiñadas a crear emprego sustentábel no concello e ao desenvolvemento de mercados de proximidade, os servizos público e sociais e un concello sustentable no futuro.
E para que o BNG sexa decisivo Xesús Pena quere contar cun grupo de veciños e veciñas de todas as parroquias e darlle un papel fundamental na candidatura aos mozos e mozas do concello. Segundo Pena, “ a mocidade ten que ser participe de todas as iniciativas que se debatan no pleno do concello e parte activa das decisións que alí se tomen.”
Ao longo dos meses, a asemblea local do BNG co seu candidato, Xesús Pena vaise achegar a todas as parroquias para recoller as propostas dos veciños e veciñas e resolver as dúbidas e inquedanzas destes. Un intenso e duro traballo para que o vindeiro 22 de maio o resultado das eleccións municipais sexa o mellor posíbel para Brión.
Brión 8 de febreiro de 2011

Roberto Pardal Coca